Mark 16
Iesu Mutulu no Anu Soli
(Mat 28:1-8; Luk 24:1-12; Ioa 20:1-10)
1Voxo Tavuna mukalu, xe ili'i la Malia sie Maxatale ilee Malia, Iakovo nenu mo Salome, ane'i milotonu ueli e tuma'u lailaixe sou milai lexe i'ulosou Iesu vasimolu no anu. 2No kakau manina no voxo vilesou lalotu va'a vile no mine aso upolosile, la ane'i milutusou milai no lulu. 3No vote'i, la ane'i mivikalane'i ngatongato'o aloxo 'o, “'Ei ane sou usu'ulinenge mo upipalo'u lavo'o e mimulaxu no lulu anaxu?”4Ia, ane'i ie'i mutelo la mimaisou lavo'o toxoxa'a ne, uai la uasi. Mipipalou muxexe ne. 5Ioxe, ane'i mi'unalai la mimaisou maulu vile a uxoxolu no avo'a tema. Ia anu mutaa tokolomo maenaxu veveeni. Ane'i mimaisou la mikuluke. 6Ia anu muvikalane'i aloxo 'o, “Ngakuluke mamu. Eni elavu lexe ngingi ngakakamuli Iesu sie Naseleti ane'i mililixu no ovu valautu. Anu a mutulu mo mumauli ne, anu uai 'o uasi. Ngamaisou tanixu ane ane'i mimulaxu no anu 'a. 7 aIa, ngalai mo ngavikalane'i ta molomolou Iesu mo Pita lexe Anu 'a muulaxungengi mulai ne Xalilaia sou lexe ngamaisou ane, aloxo Anu mulemolu noxinge tei.”
8La mi'olo'olo xe mikuluke, la sou ane'i ta sema milaa miuatu no lulu la miiave. Ia ia'alou itema vile uasi, xo ane'i mi'ume.
9 ▼ [Iesu mutulu mo mumauli no kakau manina no voxo vile 'ili'i no anu voxo Tavuna noxi'a ta Isilaeli. La sou muxali noxie Malia sie Maxatale tei. Ane sema e Iesu muxexene'i ta uleenu masua ta'uve mo muxatele tamei noxie. 10Ane'i ta mitema e ilo'a Iesu imuamua'i ikekei a ixolu itatamasou. Ia ane mixali la mivikalane'i, 11aloxo 'o, “Iesu 'a mumauli mo eni emaisou ne.” Ane'i milomusou vaikala noxie, ia imuxaxu tane'i no anu uasi.
12Xe ili'i, la ta molomolo noxou Iesu tamei mi'umesou tuala tila sou mimuamua'i milai. Ane'i milai xoo, la Iesu mupala'a noxi'a. Ane'i mimaisou la vasimolu ne iou vilemo. 13La sou ane'i ilou milivu sou mia'aloi'a ta menexi'a pa'usi'a e ane'i mixolu 'ole. Ane'i milomusou a'alo noxi'a ilou, ia imuxaxu tane'i no anu uasi.
14 cXe ili'i, la ta molomolo noxou Iesu mavulovexa vile mo mulelia vile mixolu sou i'ani'ani. La Iesu muxali noxi'a. Anu mulavixa'a xo ane'i imuxaxu tane'i no anu vaikalai'a ta mitema e mimaisou lexe Anu mutulu uasi.
15 dAnu muvikalane'i aloxo 'o, “Ngalutu mo ngalai no xalexalee tuatuala ukalusi mo ngaa'aloxu a'alo laixe ulai noxi'a ta mitema e eni ekoine'i ukalusi. 16 e'Ei ane umuxaxu tanu noxilo mo i'ulosou, la sou Lataua upamaulinu. Ia 'ei ane umuxaxu tanu noxilo uasi, la anu utulu no anu vaivaikala. 17 fLataua u'oxonu sosovo se'i no avo'a ta mitema ane'i ane imuxaxu tane'i noxilo. I'oxonu sosovo loxo. No anu xavi noxilo, la ixexene'i ta uleenu masua. Mo ivikala no anu vaivaikala se'i ane ane'i ilavusou uasi. 18 gMo ane'i itetelisou sinana veveeni xe iiexu lexa masua loxo peupeu 'o, ia umomomo sou u'oxone'i vile loxo 'o uasi. Xe imuxaxu avo'a noxi'a ta amitema e pipiena u'oxone'i, la ane'i imauli.”
19 hXe Tila Iesu muvikala aloxo ne mukalu, la Lataua muno'u mulailixu teitexi no opo loxotolo. Mulai la muxolu muva'isa'inu Lataua no avolu tema. 20 iXe ili'i, la sou ta molomolo noxou milai no xalexalee tuatuala ukalusi sou mia'aloxu. Tila ilo'a mixaxai mipita xe mu'oxonu sosovo se'i muxali sou mu'oxonu pekia'u sou vaikala noxou.]
Copyright information for
ATA